《告台灣同胞書》發表40週年紀念會今日早上喺北京人民大會堂舉行，相信唔少人都會想知，到底《告台灣同胞書》到底係乜嘢嚟嘅呢？

話說喺1979年1月1日，中、美兩國正式建交，同一日國家最高權力機關，即係全國人民代表大會嘅常委會就發表咗《告台灣同胞書》，呼籲兩岸盡快結束分裂，實現祖國統一。《告台灣同胞書》裡面提到，中國政府已經下令解放軍停止對金門等島嶼進行炮擊，呼籲兩岸結束軍事對峙，又提出兩岸「通航、通郵、通商」（三通），擴大交流。

對大陸嚟講，《告台灣同胞書》象徵意義非常大，而早喺十年前，即係2008年12月31日上午，時任中共中央總書記胡錦濤亦曾經出席《告台灣同胞書》發表30周年紀念會，期間發表兩岸政策，講話被稱為「胡六點」。

有傳媒分析指，《告台灣同胞書》象徵意義之所以大，係因為代表住大陸政府對台灣嘅態度轉變，由「武力攻台」進入和平發展嘅年代。

原圖取自網絡